रोजगारदाता कम्पनीले मेनपावरलाई दिने सेवा शुल्क नतोके मागपत्र प्रमाणीकरण नहुने

दोहा- कतारको संस्थागत मागपत्र प्रमाणीकरणका लागि सेवा शुल्क अनिवार्य गरिएको छ । नेपालबाट नयाँ श्रमिक माग गर्दा नेपालका मेनपावर कम्पनीलाई उपलव्ध गराउने सेवा शुल्क उल्लेख नगरिएको मागपत्र प्रमाणिकरण नगर्ने कतारस्थित नेपाली दूतावासले जनाएको छ ।

दूतावासले एक सूचना जारी गर्दै मागपत्र प्रमाणीकरणका लागि सेवा शुल्क अनिवार्य गरिएको जनाएको छ । नयाँ कामदार माग गर्ने रोजगारदाता कम्पनीले सम्बन्धित नेपालका रिक्रुटमेन्ट एजेन्सी (मेनपावर कम्पनी) लाई उपलब्ध गराउनुपर्ने सेवा शुल्क अनिवार्य रुपमा उपलब्ध गराउने गरी मागपत्रमा प्रतिबद्धता उल्लेख गर्नुपर्ने र त्यस्ता मागपत्र मात्र प्रमाणीकरण गर्ने व्यवस्था गरिएको दूतावासले जनाएको छ ।

यो नयाँ व्यवस्था मार्च १, २०२१ देखि लागू हुने दूतावासले जनाएको छ । उक्त सेवा शुल्क सम्वन्धी प्रतिबद्धता नभएको मागपत्र प्रमाणीकरण नगरिने समेत दूतावासले सम्बन्धित सबै रोजगारदाता कम्पनीहरुलाई जानकारीको लागि सूचना प्रकाशित गरिएको जनाएको छ ।

यस्तै दूतावासले तीन महिनाको अवधिमा समूहगत रुपमा २४६ कम्पनीको मागपत्र प्रमाणीकरण गरेको छ भने व्यक्तिगत रुपमा १७ हजार ७२३ जनाको प्रमाणीकरण गरिसकेको जनाएको छ । २९ घरेलु कामदारको पुन: श्रम स्वीकृतिको लागि सिफारिस गरेको जनाएको छ ।